baka sakaling magising
(alay sa samahang filipino ng SHAN)
saan naparoon at tila nawala
mga dakilang pinsel, sa isip ko ay lumikha
mga awit at tula, kuwento at sanaysay
na sa pangaraw-araw, pamatid sa lumbay
ang florante at laura ni ginoong balagtas
pinunla ay pag-ibig sa bayan at sa liyag
pinukaw ang puso, at naging pangahas
sa sintang makapangyarihan, hinamak ang lahat
panulat ni pepe, matalas at marahas
kung kaya ang bayan agad bumalikwas
si ibarra ay sa noli, si simoun ay sa fili
gabay ng himagsikan, nagpalaya sa bayan
ngunit ano itong sa atin ay dumating
wala ng marinig sa kabataan kong giliw
wala na ba ang ingay ng inyong lapis at papel
at maging tamis ng dila’y naging maasim na kahel
kabataan kong mahal, nawa’y muling paginitin
ang dulo ng lapis sa pagsulat sa papel
lumikha ng tula, kwento, awit at sanaysay
gisingin ang diwang matagal nang nahimlay.
Leave a Reply